مدونة النينجا

مدونة "الثورة نيوز - عاجل": بقلم المدون هيثم المكي - ملحوظة : كمال المرايحي اللي جابو نوفل و تمنع بث الحوار معاه من النيابة العمومية ثم الهايكا و توقف عالخدمة و باش يتعدى على التحقيق، ماهوش "شقيف" رئيس الفرقة 17 سيئة الذكر المعروف عند أولاد العاصمة، خاصة في الملاسين و حي هلال. "شقيف" الأصلي légende urbaine و من مشاهير و رموز الجهاز القمعي وقت بن علي، و تحكى عليه روايات صعيب نفرقو فيها بين الحقيقة و الأسطورة (يرفل وحدو بسيف إلخ إلخ). المؤكد انو كان من أعنف و أشرس رؤساء المراكز اللي عرفتهم الأحياء الشعبية، و كانوا ديما يعينوه في "بؤر التوتر"، الحوم الشانعة اللي تصعب السيطرة عليها.


كمال المرايحي سارق كنية "شقيف"، يوهر في روحو، يعمل في prestige (بعد اللي قال لك مناضل دولة). كان يخدم في مركز منوبة (قبل الإيقاف عن العمل اليوم) و عمرو ما خدم في أمن الدولة. من قبل ما يحضر في لاباس متعلقة بيه قضايا متاع تحيل و إستيلاء على محجوز إلخ.

"شقيف" رمز الدولة البوليسية في المخيلة الشعبية (و غيرو برشة ابرزهم رامبو و الجبري و بوكاسا و القائمة طويلة) اسمو محمد عمار العرفاوي، عمرو ما تعدى في الإعلام، و توة شادد فرقة مكافحة المخدرات (STUP).

لا للنسيان. التعذيب إرهاب الدولة. المحاسبة إستحقاق.